انهارده عندى كلام غريب هقوله ... انا مش عارفه ليه بقوله .. بس الاكيد انى هقوله
الدنيا بتاعتنا ديه لو ركزت فيها هتلاقيها عباره عن حفلة تنكرية كبيرة اوى
لو كنت على طبيعتك فيها هتتعامل على انك مجنون
مطبعا لازم تكون مجنون .. ياابنى انت فى حفلة تنكرية ازاى ماشى كده عادى
جايز اكون صح وجايز اكون غلط وجايز اكون فى موقف مخلينى متحامله على الامور
بس تعالوا نتكلم فى القصة اللى دائما بحب اتكلم فيها
مسألناش نفسنا ليه اخوات يوسف رموه فى البير
بغض النظر انى ديه خطة ربنا لحياته
وبغض النظر انى الشيطان استخدمهم
بس هما كان عندهم رغبة اساسية انهم يعملوا الحاجه ديه
رغم انى يوسف كان بيحبهم اوى وكان بيعمل معاهم كل حاجه كويسه
حتى بعد مرور سنين كتيرة من اذيتهم ليه كان بردوه بيحبهم
واتعامل معاهم بكل حب وكرم لانى كان داق كرم وحلاوة حب ربنا ليه
بس نرجع لنفس النقطة
هما رموه فى البير ليه
واحد:لانه مكنش شبههم كان على طبيعته اوى
اتنين : مكنش معاهم .. كان بيحب يطيع ابوه اكتر من اى حاجه
تلاته: كان طيب وبيسمع الكلام
اربعه : مكنش مزيف ... لما حلم حلم حكاه بكل بساطة .. ولما ابوه جابلوه جلبية فرح بيها وعبر عن فرحته بمنتهى البساطة
ولو دورنا هنلاقى خمسة وسته وسبعه ومليون\
وكلهم لانى الحلو اللى فى يوسف كان بيظهر الوحش اللى فى اخواته
ولانه مكنش لابس ماسك
كان صادق جدا مع نفسه ومع اللى حواليه
______________
احنا فى زمن بيحب الزيف والخداع
يعنى مثلا واحد فقير او واحده فقيرة يتجوزوا من حد غنى ويقبلوا يدوسوا على قلبهم ويعصروا على نفسهم اتنين كيلو ليمون علشان يتجوزوا الحد الغنى ده ليه
علشان يركبوا احسن عربية ويعملوا اكبر فرح وشكلهم يبقا حلو اوى قدام الناس
وانت .. انت فين ..
او تلاقى كاهن فى كنيسة .. شاطر اوى فى تمثيل دور الكاهن .. لابس لبس الكاهن وبيقوم بدور الكاهن .. بس بيحركوه عيونه اللى حواليه
وانت .. انت فين فين عنيك الروحية .. فين صلواتك وروح التمييز اللى بيدهالك ربنا
او تلاقى مدير .. بيضايقك موظف عنده جامد اوى .. ليه علشان مش بيسرق معاه او مش بيعملوه اللى يرضيه .. او مش بيمسحلوه الكرسى اللى هيقعد عليه
او تلاقى ناس ملموه على واحد جامد اوى.. لانه بيصرف عليهم .. او شكله وزواقه من بره جميل .. او هيساعدنى الاقى شغلانه او سفرية بره
او تلاقى الناس تقبل بزنى فى الخفاء وشكل اسرى جميل فى العلن .. وترفض صداقه نظيفة فى العلن
او تقبل كدب وخداع ونفاق وقتل ونميمة ومظاهر جامده وجميلة فى الكنيسة
او.. او .. او
كله عايش جوه حفلة تنكرية
لو كنت صادق مع نفسك .. ولو كنت صادق مع ربنا.. ولو كنت صادق مع الناس
هتكون بره الحفله
اشكرك يارب لانك انت كمان كنت بره الحفلة التنكرية
رفضت وصلبت وطردت لانك كنت صادق فى حبك لنا
واشكرك لانك انت
اخترت ادنياء العالم والمزدرى وغير الموجود لتبطل كل ماهو موجود
خليك صادق مع نفسك حتى لو اصبحت مزدرى وغير موجود علشان تعاين النور الحقيقى فهو كان معلقا على خشبة من اجلك معلنا حبه بكل وضوع
مبارك اسمك يارب فانت الحقيقة الاكيدة
منقول للامانة
صلو من اجلنا